كۆپلىگەن خانىم-قىزلار ھەرئاماللار بىلەن ئۆزىگە ئوزۇقلۇق تولۇقلاشقا ئورىنىدۇ. ئەمما، ئاز بولمىغانلىرىنىڭ بۇ ھەقتىكى ئورۇنۇشلىرى ئانچە ئۈنۈم بېرىپ كەتمەيدۇ. بۇنداق چاغلاردا خانىم-قىزلار ئۆزلىرىنىڭ كۈندۈلۈك تۇرمۇش ئادىتىگە قايتا نەزەر سېلىشى، ئورگانىزمدىكى ئوزۇقلۇقلارنىڭ بىكاردىن بىكار خوراپ كېتىشىگە سەۋەب بولىۋاتقان ئىشلار بارمۇ يوق؟ دېگەنلەرگە دىققەت قىلىشى لازىم.
تۆۋەندە، ئەلداۋا ساغلاملىق تورى كۆپچىلىككە كۈندۈلۈك تۇرمۇشتىكى ئوزۇقلۇقلارنىڭ زىيادە خوراپ كېتىشىگە سەۋەب بولىدىغان 5 ئىشنى كۆرسىتىپ بېرىدۇ.
- دائىم قەھۋە ئىچىش
ئامېرىكىلىق ئوزۇقشۇناسلارنىڭ قارىشىچە، قەھۋە تەركىبىدىكى كوففېئىن سۆڭەكتىكى كالىتسىينى ئېرىتىش تەسىرگە ئىگە بولۇپ، دائىم قەھۋە ئىچكەندە، بەدەندىكى كالىتسىي خوراپ كېتىپ، سۆڭەك بوشىشىش كېسەللىكى پەيدا بولۇشنىڭ خەتىرىنى ئاشۇرىۋېتىدىكەن.
تۈزەتكۈچىسى: ھەر كۈنى 1500 مىللىگرام ئەتراپىدا كالىتسىي تولۇقلاش. سەمىڭىزدە بولسۇنكى، ھەر ئىستاكان قەھۋەنى ئىچكەندە 19-37 مىللىگرام كالىتسىينى تولۇقلاپ مېڭىش كېرەك. ھەر ئىستاكان قەھۋەگە 2 قوشۇق سۈت قوشىۋېتىشمۇ ئاقىلانە تاللاشتۇر. ئەڭ مۇھىمى، ھەر كۈنى ئىچىدىغان قەھۋە مىقدارى 4 ئىستاكاندىن ئارتىپ كەتمەسلىكى لازىم.
- ھەيز مىقدارى زىيادە كۆپ بولۇش
خانىم-قىزلارنىڭ ھەر ئايدا كېلىدىغان ھەيز مىقدارى بەك كۆپ بولۇپ كەتسە، بەدەندىكى تۆمۈر ماددىسى خوراپ، تۆمۈر كەملىكتىن بولىدىغان كەمقانلىقنى پەيدا قىلىپ، ھارغىنلىقنى كەلتۈرۈپ چىقىرىدۇ.
تۈزەتكۈچىسى:ھەر كۈنى 18 مىللىگرام ئەتراپىدا تۆمۈر تولۇقلاش. كالا، بېلىق گۆشلىرى تەركىبىدە زور مىقداردا تۆمۈر ماددىسى بار. قوناق، پۇرچاق تۈرىدىكىلەر، سۇلۇ، يېشىل كۆكتاتلار تەركىبىدىمۇ ئاز مىقداردا تۆمۈر بولىدۇ. تۆمۈر قازانلارنى ئىشلىتىپ سەي قورىغاندىمۇ ئاز مىقداردىكى تۆمۈر ماددىسىنى قوبۇل قىلغىلى بولىدۇ. بۇ خىل تۆمۈر ماددىسى مول بولغان يېمەكلىكلەرنى شوخلا، ئاپېلسىن، ماندارىن قاتارلىق تەركىبىدە ۋىتامىن C مول بولغان يېمەكلىكلەر بىلەن بىرگە يېگەندە، تۆمۈر ئورگانىزم تەرىپىدىن ئوڭاي قوبۇل قىلىنىدۇ.
ئەلداۋا ساغلاملىق تورى سەمىڭىزگە شۇنى سالىدۇكى، تۆمۈر تولۇقلىغۇچى دورىلارنى ھەرگىز قالايمىقان ئىستېمال قىلماڭ! ئۇنى دوختۇرلارنىڭ كۆرسەتمىسى بويىچە ئىستېمال قىلىش كېرەك.
- دائىم چېنىقىش
دائىم نورمىدىن ئارتۇق چېنىققاندا ياكى ھەرىكەت قىلغاندا، تۆمۈر، ۋىتامىن C، ۋىتامىن E قاتارلىق ماددىلار خوراپ كېتىدۇ. ھەرىكەت قىلغاندا، ئورگانىزم ئوكسىگېننى مۇسكۇلغا يەتكۈزۈش ئۈچۈن تېخىمۇ كۆپ تۆمۈرگە ئېھتىياجلىق بولىدۇ. ھەرىكەت ھەم ھۈجەيرىگە بېسىم ئېلىپ كېلىپ ئەركىن ئىئون پەيدا قىلىدۇ. بۇ چاغدا ۋىتامىن C، ۋىتامىن E نىڭ ياردىمىغا ئىھتىياج تۇغۇلىدۇ.
تۈزەتكۈچىسى: تۆمۈردىن 18 مىللىگرام، ۋىتامىن C دىن 250 مىللىگرام، ۋىتامىن E دىن 400 خەلقئارا بىرلىك (IU) تولۇقلاش. ئامېرىكىلىق ئوزۇقشۇناسلار ھەرخىل ئوزۇقلۇق ماددىلارنى تولۇقلىغۇچى دورىلارغا زىيادە تايىنىۋالماسلىقىنى، ئىمكانقەدەر سەي-كۆكتاتلار ۋە تەبىئىي يېمەكلىكلەردىن قوبۇل قىلىشنى تەشەببۇس قىلىدۇ.
- ھاراق ئىچىش
ھاراق ئىچكەندە، بەدەندىكى ۋىتامىن تۈرىدىكى ماددىلار يەنى ۋىتامىن C، ۋىتامىن E، ۋىتامىن B قاتارلىقلار خوراپ كېتىدۇ. چۈنكى، ئىسپىرت ئورگانىزمدا زاپاس ساقلىنىدىغان سۇدا ئېرىيدىغان ۋىتامىنلارنى خورىتىۋېتىدۇ. بۇندىن باشقا، ئىسپىرت ئاشقازان ئاستى بېزىنى زەخىملەندۈرۈپ، ئەمچەك راكىغا گىرىپدار بولۇش خەتىرىنى ئاشۇرىۋېتىدۇ.
تۈزەتكۈچىسى: ھاراق ئىچمەسلىك، ۋىتامىن تۈرىدىكىلەرنى تولۇقلاش. نۇقۇت تۈرىدىكى يېمەكلىكلەر، سەي-كۆكتات، مېۋە-چېۋىلەر، قوناق تۈرىدىكىلەرنى ئىستېمال قىلىش ئارقىلىق ۋىتامىنلارنى تېخىمۇ ياخشى تولۇقلىغىلى بولىدۇ.
- ئانتىبىئوتىك ئاسما ئوكۇللارنى ئاستۇرۇش
ئانتىبىئوتىك ئاسما ئوكۇلنى كۆپ ئاستۇرغاندا، بەدەندىكى بولۇپمۇ ھەزىم قىلىش يولى ۋە سۈيدۈك ئاجرىتىپ چىقىرىش سىستېمىسىدىكى پايدىلىق بولغان باكتېرىيىلەرمۇ ئۆلۈپ كېتىدۇ-دە، ئاشقازان كۆپۈۋېلىش، سۈيدۈك يولى يۇقۇملىنىش خەتىرى كۆرۈلىدۇ. شۇڭا، ئانتىبىئوتىكلارنى بەك كۆپ ئىشلەتمەسلىك، ئىشلىتىش زۆرۈرىيىتى تۇغۇلغاندا، پايدىلىق باكتېرىيىلەرنى تولۇقلاشقا ئەھمىيەت بېرىش لازىم.
\تۈزەتكۈچىسى: ھەر كۈنى مۇۋاپىق مىقداردا قېتىق ئىچىپ بېرىش ياكى لاكتىك باكتېرىيە تولۇقلىغۇچى (乳酸菌补充剂) دىن 1 تال ئىستېمال قىلىش.
